Omonatlarni kafolatlash tizimida raqamli transformatsiyaga start berildi!

Joriy yilning 18–21-noyabr kunlari O‘zbekiston Omonatlarni kafolatlash agentligiga Koreya Depozitlarni sug‘urtalash korporatsiyasi (KDIC) va Koreya axborot texnologiyalari konsalting (KITC) kompaniyasi vakillaridan iborat delegatsiya tashrif buyurdi.

 Tashrifdan ko‘zlangan maqsad - mamlakatimizda omonatlarni kafolatlash tizimining kelajakdagi raqamli infratuzilmasini yaratish bo‘yicha amaliy muzokaralar o‘tkazish, loyihani muvaffaqiyatli amalga oshirish bo‘yicha istiqboldagi ustuvor vazifalarni belgilab olishdan iborat bo‘ldi.

Ta’kidlash joizki, loyiha Koreya xalqaro hamkorlik agentligi (KOICA)ning moliyaviy ko‘magi asosida amalga oshirilmoqda.

Tashrif davomida Koreya delegatsiyasi O‘zbekistondagi Koreya Respublikasining Elchixonasi, KOICA vakolatxonasi, O‘zbekiston Respublikasi Markaziy banki hamda Axborotlashtirish Bosh markazi vakillari bilan uchrashuvlar o‘tkazdi.

 Uchrashuvlarda omonatlarni kafolatlash sohasida zamonaviy IT-platforma yaratish masalasi, uning arxitekturasi va texnik-iqtisodiy asoslarini ishlab chiqish, ish jarayonlariga integratsiya qilishning konseptual yechimlari muhokama qilindi. Shu bilan birga, loyihaning Bosh rejasi (ISMP)ni tayyorlash, tadqiqotlarni amalga oshirish, dastlabki bosqichda amalga oshiriladigan muhim masalalar yuzasidan kelishuvlarga erishildi.

Ushbu tashrif va muzokaralar O‘zbekiston omonatlarni kafolatlash tizimini butunlay yangi formatga - raqamli, tezkor va shaffof boshqaruv platformasiga o‘tkazish yo‘lida muhim qadam bo‘ldi. Yaratiladigan IT-infratuzilma omonatchilarning huquqlarini yanada mustahkam himoya qilish, jarayonlarni avtomatlashtirish va tizimning umumiy samaradorligini oshirishga xizmat qiladi.

 Agentlik ushbu yo‘nalishdagi yangiliklarni jamoatchilikka muntazam ravishda yetkazib borishda davom etadi.